Patay ang negosyante sang baboy matapos nga gintiro sang wala makilal-an nga suspetsado sa 18th St. Brgy. 5, Bacolod City, alas 07:55 ang takna, kagab-i.
Suno kay Bacolod Police Station 2 station commander Police Capt. Paul Vincent Pendon, ginkilala ang biktima kay Geory Adeva, legal age kag residente sang Purok Tompok, Brgy. Handumanan,Bacolod City.
Suno kay Pendon, alas 07:55 sang gab-i nakabaton sila sang tawag nga may yara sang nagluntad nga shooting incidents sa nasambit nga lugar.
Gilayon man nila ginpadulungan ang crime scene kag nakita nga nahapaon ang lalaki nga may igo na sa likod sang ulo sini samtang natumba naman sa ingod sini ang itom nga Honda nga motorsiklo nga may plate number nga 0812 022564.
Gilayon man ang mga ini nagtawag sang responder kun sa diin alas 08:05 ang takna sang gab-i gindeklarar nga dead on the spot si Adeva sang team leader sang Villamonte Life Saver.
Suno diri, si Adeva nga nagasakay sa motorsiklo ang ginsundan sang suspek nga nagasakay man sa motorsiklo tubtob nga nakalab-ot sa nasambit nga lugar kag gintiro kun sa diin nagpalagyo man sa nakatungdan nga direksyon matapos ang insidente.
Suno sa station commander, santo sa panaysayon sang witness, lima ka lupok ang nabatian sini.
Suno kay Pendon, ginpahayag man sang witness nga nabatian pa sini ang ginhambal sang suspek nga “naling-an na ako sa imo, katapusan mo na.”
Narekober sa crime scene ang apat ka empty shell sang 9mm.
Ang biktima ang may yara sang lima ka mga kabataan kag naganegosyo sang baboy.
Indi pa matumod ang motibo sang pagpatay sa biktima apang may anggulo na sila nga ginalantaw sa nagluntad nga shooting incident.
Padayon pa sa karun ang imbestigasyon sang Bacolod Police Station 2 kag nagatipon naman ang mga kapulisan sang CCTV footage agud nga makabulig sa imbestigasyon kag matumod ang suspek sa natabo nga shooting incident.
