Nakuha sang Negrense beauty queen nga si Gwendolyne Fourniol ang korona sa nagtakop nga Miss World Philippines 2022 pageant kag magarepresentar sa Pilipinas sa international stage.
Ang coronation ang ginpatigayon kagab-i sa Mall of Asia Arena kag sa 35 ka iban pa nga mga kandidata, si Fournoil, nga tumandok sang Himamaylan, Negros Occidental, ang ginkilala bilang Miss World Philippines.
Siya ang nagtal-os kay Tracy Maureen Perez, nga nagtapos sa Top 12 sang international pageant nga ginpatigayon sa Puerto Rico sang tinalikdan nga Marso.
Magluwas sa korona, nakuha man sini ang Miss Silka Award, Miss Love Your Skin Award kag ginkilala bilang Best in Evening Gown.
Sa question and answer segment, ginpamangkot ini kun paano makacope up ang Pilipinas sa kakulang sa edukasyon bangud sa pandemic.
Confident nga ginsabat sang Negrense beauty queen nga bilang isa ka advocate sang edukasyon, nagakompormi ini nga ang tuman nga natam-an amu ang mga kabataan nga may kakulang sa access sa edukasyon.
Suno sa iya, kaupod ang ERDA Foundation nga naga-empower sa mga marginalized Filipino, nagapati ini nga sa pag-isa sa mga benefactors, pag-engganyo sang mga kabataan kag pagpahanugot sa mga ini nga makabalik sa eskwelahan ilabi na sa pandemic ang mas makapaayo sa kalibutan bangud ang edukasyon ang pinakadako nga armas batok sa kapigaduhon.
Ginkoronahan man ang anum ka iban pa nga mga kandidata nga magarepresentar sa pungsod sa international stage sa ila nagkalain-lain nga titulo.
Ginkilala bilang Miss Supranational Philippines 2022 si Alison Black sang Las Pinas City; Reina Hispanoamericana Filipinas 2022 naman si Maria Ingrid Santamaria sang Paranaque City; Miss Eco Philippines 2022 si Ashley Subijano Montenegro sang Makati City; Miss World Philippines Tourism 2022 si Justine Beatrice Felizarta sang Marikina City; Miss Eco Teen Philippines 2022 si Beatriz McLelland sang Aklan samtang Second Princess kag Miss World Philippines Charity 2022 si Cassandra Chan sang San Juan City.
