Gindominar sang Negros Occidental ang Boxing Team sang Pilipinas sa 21st SEA Games bangud sa siyam ka mga atleta, apat ang tumandok sang Negros Occidental kun sa diin duha ang nakakuha sang gold medal kag duha ang bronze.
Ang mga atleta sang probinsya amu sanday Rogen Ladon sang Bago City kag Ian Clark Bautista sang Binalbagan nga lunsay nakakuha sang gold samtang magapauli naman sang bronze medal ang isa pa ka Bagonhon nga si James Palicte kag Riza Pasuit, tumandok man sang Binalbagan.
Natuman na ang handom ni Bautista nga makakuha sang gold medal matapos nakaagum sang bronze medal sang 2017 kag 2019 edition sang SEA Games.
Kahapon, nakuha ni Bautista ang gold sa men’s 59 kg division kag ginauyatan na sa karun ang men’s featherweight title matapos nalutos ang iya kasumpong nga si Naing Latt nagikan sa Myanmar.
Sa interview sang Bombo Radyo kay Bautista, tumandok sang banwa sang Binalbagan, ginakalipay sini nga siya ang nakakuha sang bulawan matapos ang pila ka bulan nga kabudlayan sini sa training.
Suno sa iya, mas pabor ini nga nagabato ang iya kontra.
Suno diri, antes ang hampang, nagpanugyan ang iya mga coaches nga mangin agresibo kag ginhimo sini ang iya masarangan apang gintugyan na lamang sa Ginoo ang resulta sang hampang.
Nagapasalamat si Bautista sa tanan nga nagasuporta sa mga atleta indi lamang sa patag sang boxing kundi sa tanan nga sports sa Vietnam.
Si Bautista, nga miyembro sang Philippine Navy kag may rango nga seaman second class, ang may 5 wins, 0 losses sa iya 31st SEA games journey.
