Maga-advance sa ila tagsa-tagsa ka gold medal rounds ang mga Filipino boxers nga sanday Eumir Felix Marcial kag tumandok sang Negrense boxer Rogen Ladon nga tumandok sang Bago City, samtang ang kasimanwa sini nga si James Palicte kag boxers nga sanday Josie Gabuco kag Riza Pasuit ang napierde sa semifinal sang 31st Southeast Asian Games sa Hanoi, Vietnam kagab-i, Mayo 19 sa Bac Ninh Gymnasium.
Ginlutos ni Marcial si Peerapat Yeasungnoen sang Thailand sa men’s middleweight samtang nakuha man ni Ladon ang kadalag-an matapos sini nalutos ang Thai opponent nga si Thanarat Saengphet, sa score nga 4-1 sa men’s men’s flyweight category.
Si Marcial kag Ladon, lunsay sigurado na nga may silver medal, ang nagalaom pa nga makakuha sang gold kag madepensahan ang ila tagsa-tagsa ka mga SEA Games title.
Gindominar ni Marcial si Yeasungnoen sa una pa lamang nga round kag nagpaulan sang body shots agud mapaatras ang Thai voxer.
Nangin mahinay naman ang panugod ni Ladon apang nangin agresibo sang ikaduha kag ikatatlo nga round rason kun ngaa nalutos sini si Saengphet sa iya counter punches kag mga atake.
Samtang, si Palicte, nga amu ang reigning light welterweight regional champion, ang wala nakapangaman sa third round kadungan sang pag-abanse sang kontra sini nga si Farrand Papendang sang Indonesia kag nakuha ang kadalag-an sa score nga 4-1.
Nagpaulan sang makusog nga kombinasyon sang punches si Papendang sa bilog nga third round sang nangin stagnant kag inactive si Palicte.
Nalutos man si Gabuco sa score nga 3-2 sa kamot ni Chuthamat Raksat sa third round.
Ang Filipina boxer ang nakakuha ang gold medal sa light flyweight division sang 2019 edition sang SEA Games nga ginhiwat sa Pilipinas.
Si Pasuit, nga 2019 SEA Games lightweight silver medalist, ang indi maka-asinta sang mayo sa iya kontra nga mas mataas sa iya, si Vuong Thi Vy sang Vietnam sa 54-57 kg class.
Sigurado naman ang bronze medals sanday Palicte, Gabuco kag Pasuit.
Si Marcial ang magacompete para sa gold sa Domingo, Mayo 22, batok kay Delio Anzaqeci Mouzinho sang Timor Leste.
Samtang pagadepensahan naman ni Ladon ang iya titulo batok kay Thao Tran Van sang Vietnam.
Tanan nga siyam ka mga Filipino boxers nga ginpadala sa Vietnam ang magapauli na nga may medalya kun sa diin sanday Nesthy Petecio, Ian Clark Bautista, Irish Magno, kag Marjon Pianar ang sigurado naman sa bronze medals.
