![](https://img.bomboradyo.com/bacolod/2019/12/WESTERN-VISAYAS-BOXERS.jpg)
Tatlo ka bulawan kag isa ka silver nga medalya ang nadugang sang mga Negrense boxers sa kabug-usan nga medalya sang Pilipinas sa nagapadayon nga SEA Games 2019.
Una nga nagkuha sang bulawan ang tumandok sang Brgy. Lag-asan, Bago City nga si Rogen Ladon matapos ginlutos sini ang Thai nga kasumpong nga si Yao Tam Amarit sa PICC Forum kahapon sa men’s flyweight division via unanimous decision.
Sunod nga nagkuha sang bulawan sa 64 kilogram category ang Bagonhon gihapon kag residente sang Brgy. Sampinit, Bago City nga si James Palicte matapos ginlutos ang Vietnamese boxer nga si Van Hai Nguyen.
Gindugangan man ini sang isa ka boxer nga ginbun-ag sa ciudad sang Kabankalan City, Negros, Occidental apang sa karun nagapuyo na sa Davao City nga si Charly Suarez sang makakuha sang gold medal matapos malutos ang Thai boxer nga si Khunatip Pidnuch.
Nagkuha naman sang silver medal ang isa ka Negrense nga si Risa Pasuit sa women’s lightweight ukon 60-kilograms division matapos malutos sa Thai boxer.
Gintuman sang Bagonhon boxer nga si Rogen Ladon ang iya handum nga makakuha sang bulawan nga medalya.
Una pa lamang nga round sang hampang, nagpakitang gilas na ini bangud sa madasig sini nga paghaboy sang counter punches sa kasumpong niya nga Thai boxer nga si Yao Tam Amarit.
Sa second round, nangin agresibo si Amarit apang madamo nga punches sini ang nagtupa sa hangin.
Makapila ka beses nga gintake down sang Thai boxer si Ladon apang padayon ang Negrense boxer sa paghaboy sang counter punches.
Samtang sa third round, nawahiran ini sang iya kasumpong rason sang iya pagkatumba apang wala ini nangin upang kay Ladon sa pagkuha sang bulawan nga medalya.
Ini ang labing una nga gold medal sang boksidor bangud sa iban niya hampang sa luwas sang pungsod, nagkuha lamang ini sang silver medal.
Sa interview sang Bombo Radyo Bacolod kay Rogen Ladon, nagpahayag ini sang iya pasalamat sa Ginoo kag tanan nga tagsuporta niya sa iya hampang.
Aminado man ini nga may masakit sa iya lawas bangud man sa igo sang sumbag sang iya kasumpong apang gin-agwanta niya ini agud makuha lamang ang bulawan nga medalya.
Samtang, gindugangan man sang isa pa ka Bagonhon boxer nga si James Palicte sang Brgy. Sampinit, Bago City, matapos nga ginlutos sini ang Vietnamese boxer nga si Van Hai Nguyen sa light welterweight division.
Ini ang labing una nga paghampang sang 25 anyos nga boxer sa Southeast Asian Games kag labing una nga gold sa iya boxing career.
Wala nalingkang ang boksidor apisar beterano ang kasumpong sini.
Sa interview sang Bombo Radyo Bacolod kay James Palicte, nagpahayag ini sang pagpasalamat sa tanan nga nagsuporta kag ginpasalamatan man sini nga gindisiplina siya sang iya amay kun sa diin ini man ang nagtulod sa iya agud mangin boksidor.
Wala gid gin-uyangan sang isa ka Negrense boxer ang kahigayunan nga makahampang siya dala ang pangalan sang pungsod.
Si Charly Suarez ang nakakuha sang gold medal sa men’s boxing lightweight division sa nagapadayon nga 2019 Southeast Asian (SEA) Games nga ginhiwat sa PICC Forum kahapon.
Sa exclusive interview sang Bombo Radyo kay Suarez, ginpahayag sini nga apisar mabaskog man ang iya kasumpong nga si Khunatip Pidnuch sang Thailand, gintinguhaan niya gid nga magdaog agud makuha ang ika-tatlo niya nga gold medal sa patag sang boksing.
Suno diri, saludo man siya sa pambato sang Thailand apang nagapati siya nga ginhatag gid ini sang Ginoo sa iya.
Dugang pa ni Suarez, ginahalad niya ang iya kadalag-an sa pungsod.
Nahibaluan nga si Suarez ang ginbun-ag sa Kabankalan City apang nagdako sa Davao.