Indi makapati ang isa ka Negrosanon nga makalab-ot sa luwas sang pungsod ang mga desenyo sini sa pagmodify sa mga salakyan.
Sa interview sang Bombo Radyo kay Vermin Agbon, nga ginkilala bilang master of car modification and design excellence, nag-umpisa ini sa edad nga 12 anyos kun sa diin hilig sini nga maghampang sa mga ginahimo man sini nga mga hampanganan nga salakyan gamit ang lata.
Suno diri, sadto nagakakita lang sini sa TV ang pagcustomize sang salakyan.
Apang sa karun, madamo na ini sang nabaton nga awards kaangay sang winner of best body kit champion street, best body kit champion wils, best car shop kag iban pa.
Madamo man ini sang mga costumer nga kun kaisa nagapa-home service pa kaangay sa Kabankalan City kag Cadiz City kag iban pa nga bahin sang probinsya.
Dugang pa gid, bisan siya nakibot nga ang disenyo sini naglab-ot na sa Thailand kag Estados Unidos.
Ini tanan nakapa-inspire sa iya para magtrabaho pa gid.
