Nagapati ang isa ka conservationist kag environmentalist nga climate change ang isa sa mga rason sang mga wildfires nga nagaluntad sa nagkalain-lain nga bahin sang kalibutan.
Sang nagliligad nga mga inadlaw, may mga reports sang wildfires sa pila ka mga estado sang Amerika lakip na ang Hawaii, California kag Canada kasubong man sa pila ka bahin sang Europa.
Sa interview sang Bombo Radyo ky Errol Abada Gatumbato, may yara sang mga wildfires nga human induced apang masami ini nga ginatuga sang tuman ka init nga tiyempo.
Suno kay Gatumbato, bangud sa tuman kainit kag mala nga klima, hinali lamang nga naga-igrab kag nagatuhaw ang kalayo sa isa ka lugar ilabi na ang mga forest kag grass areas.
Apisar nga may mga insidente naman sang forest fires sa Pilipinas, indi ini tuman ka makahalalit kaangay sang sa luwas sang pungsod.
Ini bangud nga ang ila forest structure ang tuman ka mala indi kaangay sa Pilipinas nga may moisture ukon basa.
Suno sa environmentalist, ang mga wildfires nga nagakatabo sa nagkalain-lain nga bahin sang kalibutan ang may dako man nga halit sa ozone layer bangud sa gina-emit sini nga carbon kasubong man ang polusyon nga makatuga sang risgo sa ikaayong lawas.
Aminado si Gatumbato nga mabudlay kontrolon ang sitwasyon kun mismo ang nature ang may kahimuan gani isa sa mga makatapna sang wildfires amu ang nature man paagi sa pag-ulan.
Suno sa iya, indi na mapunggan ang climate change sa karun kag ang negatibo sini nga impact gani ang adaptation na lamang ang dapat nga himuon sang mga tawo.
Panugyan sini nga magcontribute sa pagprotekta sang environment paagi sa responsable nga paghaboy sang basura, pagconserve sang kuryente kag pag-advocate sang environmental protection sa komunidad.
