Nagpanugyan ang isa ka environmentalist nga dapat protektahan ang mga water shed sa probinsya sang Negros Occidental agud nga indi maeksperyensyahan sa ulihi ang pagbaha nga natabo sa Luzon sang nagligad nga semana bangud sa Bagyo Rolly kag Bagyo Ulysses kadungan sa pagselebrar sang Climate Change Consciousness Week.
Sa interview sang Bombo Radyo Bacolod kay Dave Albao, executive director sang Philippine Reef and Rainforest Conservation Foundation, ginpahayag sini nga ang Climate Change Consciousness Week ang tion agud nga maistoryahan kun ano ang pwede mahimo agud mapasiguro nga maproteksyunan ang baga sang Negros Occidental ukon ang Mt. Kanlaon Natural Park kag ang Northern Negros Natural Park.
Suno kay Albao, ang mga water shed ang dapat gid nga mapabilin kag indi paggub-on agud nga may yara sang magasuyop sa mga gas emmission sa palibot.
Nahibaluan nga ang gas emmission ang nagadulot sang climate change kun sa diin nagapakusog pa gid nga nagapakusog sa mga naga-alabot nga bagyo.
Dugang pa sini nga dapat mangin vigilante ang tanan agud nga indi madula ang mga water shed sa probinsya.
Pananglitan nga madula ang mga ini, indi malayo suno kay Albao nga magbaha man sa Negros Occidental kun maigo ini sang mabaskog nga bagyo bangud wala na sang magasuyop sang tubig dala sang pag-ulan.
Suno diri, ang water shed ang natural climate solution sang kalibutan gani nagakadapat lang nga indi ini pagtandugon.
