BACOLOD CITY — Magabaton sang cash incentive kag recognition gikan sa provincial government sang Negros Occidental ang 13-anyos nga Negrense nga nangin gold medalist kag gindeklarar pa nga Most Valuable Player (MVP) sa 3rd World Cadet Taekwondo Championship sa Egypt sadtong Agusto 24 tubtob 27.
Ini matapos nga nagbaton sang unanimous approval sa mga katapo sang provincial board ang resolution nga ginduso ni Board Member Renato Malabor Jr. para sa pagkilala kag cash incentive para kay Mary Angeline Uy Alcantara.
Magabaton sang 50 mil pesos si Alcantara kun sa diin ang 30 mil ang para sa gold medal samtang ang 20 mil ang para sa MVP award sini.
Tuman naman ang pagpasalamat ni Alcantara sa tikang sang provincial board kag subong man sa tanan nga suporta nga ginhatag sini, partikular ni Governor Alfredo Marañon Jr. kag ni Murcia Mayor Andrew Montelibano.
Suno kay Mary Angeline, ginapabugal sini ang iya kaugalingon kag subong man ang iya mga ginikanan para sa kadungganan nga nahatag sini para sa probinsiya kag sa pungsod.
Handum naman sini nga makalab-ot sa mas prestihiyoso nga mga torneyo, partikular na ang Olympic Games.
Si Alcantara ang anak sang isa ka taxi driver kag empleyado sang hotel kag isa ini ka scholar sa isa ka pribado nga eskwelahan sa ciudad.
Samtang, wala sang secret recipe sa pagdaog sang 13-anyos nga Negrense nga nangin gold medalist kag gindeklarar pa nga Most Valuable Player sa 3rd World Cadet Taekwondo Championship sa pungsod Egypt.
Ginpahayag ni Vic Feria, ang coach kag trainer ni Mary Angeline Uy Alcantara, ila lamang ginpreparahan sang maayo ang torneyo kag malipayon ini bangud mismo ang bata ang determinado nga mag-training.
Dugang pa diri, suno kay Feria, ang daku nga suporta sang mga ginikanan ni Mary Angeline nga nagsakripisyo agud mahatag ang mga kinahanglanon sini.
Suno sa coach, tuman ini ka malipayon sang magdaog si Mary Angeline, indi lamang bilang trainer, kundi subong man para sa mga ginikanan sang bata nga wala nagbuya sa handum sang ila atleta nga anak.
Nahibaluan nga ang ulihi nga kasumpong sini ang isa ka Russian nga mas mataas kag mas daku kun ikumparar sa iya apang iya ini nalutos sa score nga 18-3.
Samtang, ginpahayag ni Feria nga ila naman ginahanda si Mary Angeline para sa Olympiada.
Sa madason nga bulan, natalana ini nga maghampang sa Korea bilang kabahin na sang ila preparasyon sa Olympic Games.
