Ginkumpirmar sang provincial election supervisor sang Negros Occidental nga nalakip ang isa ka Negrense nga nagpapili sa pagka-senador sa mga gin-disqualify sang Commission on Elections sa 2025 National and Local Elections.
Suno kay Atty. Ian Lee Ananoria nga ginserbehan na sang notice of disqualification si Jonry Gargarita, 36-anyos, isa ka independent candidate nga residente sang Barangay Progreso, Binalbagan, Negros Occidental.
Suno kay Ananoria, ang notice ang gin-serve kay Gargarita sang tinalikdan nga semana.
Ang Negrense ang nalakip sa 117 ka mga nag-file sang certificate of candidacy (COC) sa pagka-senador nga gin-disqualify sang first kag second divisions sang Comelec matapos gindeklarar nga nuisance candidate santo sa rekomendasyon sang Comelec Law Department.
Ginpahayag man sang provincial election supervisor sang Negros Occidental nga si Gargarita ang nagpapili man sadtong 2022 bilang bise-gobernador sang Negros Occidental batok kay Vice-Governor Jeffrey Ferrer kun sa diin nakakuha ini sang masobra sa 70,000 votes.
Ginpahayag na sadto ni COMELEC Chair George Garcia nga ang ginadeklarar nga nuisance amo ang mga wala sang serious intention sa pag papili para sa eleksyon.
