Dream come true para sa isa ka Negrense nga nag Top 2 ini sa August 2023 Medical Technologist Licensure Examination.
Sa interview sang Bombo Radyo kay Gabriel Martin Canillas, ginpahayag sini nga siya ang tumandok sang Silay City, Negros Occidental apang sila ang nagapuyo na sa karun sa Bacolod City.
Si Canillas ang graduate sang University of San Agustin sa Iloilo kag nagpangaduha sa pasinawan matapos nakakuha sang rating nga 92.70.
Na-graduate ini sang elementary sa St. Scholastica Academy samtang sa University of St. La Salle naman siya nag-eskwela sang high school kag senior high school.
Nagkuha ini sang kurso nga medical technology bangud kun makakita ini sang laboratory result, siya ang nagaka-curious kag nagaka-amaze.
Suno diri, yara pa ini sa Enchanted Kingdom kaupod ang iya mga abyan sang nagwa ang resulta kag sang nahibaluan sini nga siya ang Top 2, siya ang naghibi.
Wala si Canillas naglaom nga siya ang madala sa Top 10 bangud mabudlay para sa iya ang exam.
Isa naman sa mga pagpanghangkat sa iya pag-eskwela ang COVID-19 pandemic bangud nabudlayan ini sang online class kag mas epektibo para sa iya ang face to face classes.
Apang iya ini ginkabig nga challenge agud malab-ot ang iya handum kag makaangkon sang maayo nga puturo.
Plano sini nga ipractice ang pagka-medical technologist kag kun mahatagan sang kahigayunan, magaproceed ini sa pagka-doktor sa masunod nga tuig.
Nagapasalamat ini sa Ginoo, sa iya mga ginikanan kag mga abyan nga padayon nga nagahatag sa iya sang suporta.
Panugyan ni Canillas sa mga estudyante nga magpangamuyo, magpaninguha kag magset sang goals agud makaangkon sang motibasyon sa pagpadayon.
