Nalakip ang isa ka Filipino teacher sa nakabatun sang 2023 Shell Awards sa New Mexico, USA.
Sa interview sang Bombo Radyo kay Dr. Roy Binias Basa, manunudlo sang science kag career and technical education (CTE) sa Zuni Public School District sa New Mexico, ginpakigbahin sini nga antes magtudlo abroad siya ang 15 ka tuig man nga nagtudlo sa Pilipinas.
Siya ang tumandok sa Barangay Lopez Jaena, Murcia apng nag-obra kag nakapangasawa sa Bacolod City kun sa diin sila ang nagpuyo sa Barangay Tangub.
Nakatudlo naman ini sa Negros Occidental National High School (NOHS), University of St. Lasalle-Bacolod, University of Negros Occidental-Recoletos, St. John’s Institute ukon Hua Ming, STI, Bacolod City College kag Bago City College.
Ang mga nasambit nga experience ang kalakip man sa naghanas sa iya agud mangin mas epektibo nga manunudlo indi lamang sa Pilipinas kasubong man sa iban nga pungsod.
Antes magtudlo sa New Mexico, si Basa ang una naman nga nagtudlo sa Arizona, USA sang duha ka tuig, samtang magadangat naman ini sa tatlo ka tuig sa Zuni.
Paathag ni Basa, nga kalabanan nila nga mga estudyante ang native American-Indian bangod ang lugar ang isa ka reservation area.
Ginapasalamatan sini nga siya ang nahatagan sang kahigayunan nga mapakita ang ikasarang sa Pilipino kag kun paano magserbisyo ang mga Pinoy.
Paathag ni Basa nga ang National Science Teaching Association (NSTA), ang pinakadako nga organisasyon sang mga science teachers sa Estados Unidos, ang ginabug-usan sang 50 ka mga estado kag may miyembro nga nagadangay sa masobra 40 mil.
Ang NSTA ang may-ara man sang mga sponsors kalakip na ang Shell USA Inc., kun sa diin siya ang isa sa pito ka nahatagan sang “Shell Urban Science Educator Development Award”.
Suno kay Basa, siya lamang ang Pilipino nga napasidunggan sa nasambit nga awarding.
Isa sa basihan sa pagbatun sang pagkilala ang kun paano naga-engage sa mga kabataan kasubong man kun paano ginaconnect sa kumunidad ang pagtudlo kag mga proyekto.
Kaangay lamang sa proyekto sini nga kaangay sa biodiesel kun sa diin sila ang naga-extract sang oil gikan sa isa ka sahi sang native seed plants.
Aminado si Basa nga indi mahapos kag madamo sang kabudlayan ang trabaho sang science teacher, apang pinaagi sa dedikasyon, commitment, time management kag pagpangamuyo sarang ini nga mahimo
Magluwas sa nabatun nga pasidungog sa luwas sang pungsod, si Basa ang nakabatun naman sang madamo nga mga awards sa Pilipinas kaangay sang Most Outstanding Teacher of the Philippines sang 2016, Most Promisingh Science and CTE Teacher all over Asia kag madamo sang iban pa.
