Ginakabig sang isa ka Bacoleño nurse nga fulfillment ang pagbulig niya sa mga crew sang eroplano nga mapabata ang isa ka iloy sa tunga-tunga sang ila flight sang Hulyo 9 sang kaagahon.
Si Francis Dominic Mendoza sang Barangay Tangub kag nagatrabaho sa Ireland ang nagpauli diri sa Pilipinas sang Hulyo 7 agud magbakasyon.
Hulyo 8 sang gab-i, nagdepart sa Doha, Qatar Airport ang eroplano nga iya ginsakyan kag nakasakay sini ang Pinay nga nagabusong.
Samtang yara na sa kahawaan sang Thailand sang Martes sang kaagahon, nag-anunsyar ang crew sang eroplano kun sin-o ang may yara sang medical background bangod may isa ka iloy nga manugbata.
Bilang isa ka nurse, nagvolunteer si Mendoza nga magbulig pabata sa babayi.
Upod ang mga cabin crew, nagbuligay sanday Mendoza agud mapagwa ang isa ka healthy baby boy.
Bangod wala sang mga kagamitan sa pagpabata sa eroplano, ila nalang gingamit ang available resources.
Suno kay Mendoza, agud masiguro ang kaluwasan sang mag-iloy, iya gid ginmonitor ang vital signs sini.
Aminado si Mendoza nga dako nga risgo ang pagpabata sa eroplano bangud sa kakulang sang kagamitan.
Bangud kinahanglan nga malantaw sang mga doktor ang kondisyon sang mag-iloy, nag-emergency landing ang eroplano sa Bangkok Airport, antes nagpadayon sa Ninoy Aquino International Airport.
Nabilin naman sa ospital sa Bangkok ang mag-iloy.
Sa pihak sini, wala na nakuha ni Mendoza ang pangalan sang iloy kag sang iya anak.
Aminado ang Bacoleño nurse nga ‘one in a million experience’ ang iya pagpabata sa iloy sa eroplano.
