BACOLOD CITY — Ginalauman nga magaabot subong nga adlaw sang bangkay sang isa na naman ka Negrense nga suldado nga napatay sa nagapadayon nga engkwentro sang tropa sang gobyerno kag sang Maute-ISIS group sa ciudad sang Marawi.
Ginkumpirmar ni Dennis Baroa sang ciudad sang San Carlos ang kamatayon sang iya utod nga si Corporal Arjay Baroa sang Philippine Army Scout Ranger.
Suno diri, ginpahibalo sila kahapon sang girlfriend ni Corporal Baroa sang iya nadangatan sa war zone kun sa diin naigo ini sa iya nga liog.
Masobra na tatlo katuig nga ini ang nagaserbe sa Scout Ranger apang handom kuntani sini ang mangin pulis.
Nahisayran man sa utod nga kalaslon na sini nga bulan ang suldado kag natalana kuntani nga magpauli para sa 45 dias nga bakasyon.
Apang masubo ang ginbaton nila nga balita kahapon.
Nagpadulong naman kahapon ang pila ka katapo sang 79th IB sang Philiippine Army sa puluy-an sang mga Baroa agud magkuha sang mga impormasyon kag mapasiguro nga hilway ang mga suldado nga maga dul-ong sa iya kasunod sang ambush sa ciudad sang Guihulngan kag posible karun sa hapon maga-abot ang iya bangkay gikan sa Cagayan de Oro City.
Kamanghuran sa tatlo ka mag-ulutod si Corporal Baroa kag gina handuraw ini sang iya magulang nga si Dennis bilang isa ka maisog, mabuot kag kun kaisa labutaw nga sahi sang utod.
Sa karun suno kay Dennis, ginapabakod na lang sang ila pamilya ang ila nga kaugalingon ilabi na ang ila mga ginikanan.
Apang antes pa man ang masubo nga balita suno kay Dennis, nagligad nga mga inadlaw nakakita ang ila iloy sang itom nga alibangbang sa ila nga balay kag nasalapay sini kag nabuka ang kristal sang picture frame ni Corporal Baroa.
