BACOLOD CITY — Magasabak na subong nga aga sa una nga game ang duha ka Negrense softball teams nga nagapasakop sa Asia Pacific Little League Softball Championship sa Singapore.
Suno kay Juniors League Coach Roselle Hulleza, atubangon nila ang team sang Australia alas 8:30 subong nga aga.
Ang juniors league ang naga-edad 13 tubtub 14 kag may duha gid lamang ka kasumpong nga amo ang Australia kag Singapore.
Samtang, ang majors league naman nga naga-edad 11 tubtub 12 ang magaatubang sa Singapore, alas 9:00 sa aga.
Kinahanglan sang majors nga makakuha sang tatlo ka daog agud nga madeklarar nga kampeon bangud Singapore lamang ang ila kasumpong.
Kahapon, nag-courtesy call kay Philippine Ambassador to Singapore Joseph Del Mar Yap ang duha ka teams antes ang hampang subong nga aga.
Sa interview sang Bombo Radyo Bacolod, ginpahayag ni DepEd Region 6 Director Gemma Ledesma nga gin-engganyo sang ambassador ang pambato sang Pilipinas nga himuon ang tanan agud makuha ang kampeonato.
Suportado man suno sa iya ni DepEd Secretary Leonor Briones ang duha ka teams.
Ang Asia Pacific Little League Softball Championship ang patigayunon halin Hunyo 29 tubtub Hulyo 1 sa United World College of South East Asia – Dover Campus sa Dover, Singapore.
