Nagpadala sang 24,000 boxes sang mingo meals ang isa ka non-government organization sa Negros Occidental sa mga apektado sang pagbaha sa Naga City bangod sa Severe Tropical Storm Kristine.
Sa interview sang Bombo Radyo Bacolod kay Millie Kilayko, President kag chief executive officer sang Negrense Volunteers for Change Foundation, ang mga mingo meals ang ginpadala kahapon kag maga-abot sa Naga City subong nga adlaw.
Ang mingo meals ang pagkaon para sa mga kabataan nga kaangay sang porridge ukon nilugaw apang ini ang mas nutritious kun ipanggid sa mga ginapanagtag nga noodles.
Ang mingo meals ang may chocolate, squash kag ube flavors man agud indi masum-uran ang mga kabataan, kag bisan adult ang sarang man nga makapangayo.
Bangod powder ang kada putos sang mingo meals, ini ang masami nga ginabutangan sang mainit nga tubig, ukon mahimo man nga deretso nga kaunon kaangay sang polboron.
Paathag ni Kilayko nga sila ang nagapadala sang emergency relief sa ano man nga mga kalamidad kag trahedya kaangay sadto sa Marawi siege, paglupok sang Bulkan Taal, mga linog kag iban pa.
Suno diri ginaseguro nila nga may ara nga ground partner sa padal-an nga lugar agud maseguro nga makalab-ot sa nagakinahanglan ang bulig.
Sa Naga City, ang Angat Buhay Foundation ang nagserbe nila nga ground partner.
Magluwas sa Naga City, may nagrequest man sang bulig sa Daet, Camarines Norte kag sila ang nagacontact pa sa magaserbe nga ground partner.
Suno kay Kilayko, limitado lamang ang ila nga resources gani nagapanawagan ini sa mga may maluluy-on nga tagipusuon nga mahimo magsuporta sa ila hilikuton.
Sa mga luyag magbulig, magkonekta lamang sa NVC foundation website, facebook page kag instagram agud mahatagan nila sang detalye kun paano makabulig.
