BACOLOD CITY-Nakuha sang Negrense team nga tiglawas sang Pilipinas ang kampyunato sa major’s division sang Asia Pacific Little League Softball Championship sa Singapore.
Sa hampang las-9:00 kaina sang aga, nakuha sang mga Negrense ang kampyunato sa paglutos sa host country nga Singapore, 20-0.
Suno kay Lizviminda Jalandoni, determinado gid ang mga players nga makuha ang kampyunato.
Nangin lyabe man sang ila kadalag-an ang ila pitcher nga si Mary Joy Alpitche sang banwa sang Hinobaan.
Suno kay Coach Jalandoni, nabudlayan ang pangontra kay Alpitche bangud nga left-handed ini.
Suno pa kay Jalandoni, madamo man nga mga ginikanan sang Singaporean players ang naglantaw sa hampang samtang naga-cheer man sa mga Pinoy ang ila delegasyon kag pila ka mga overseas Filipino workers (OFW) nga kilala man sang pila ka players.
Samtang suno kay coach Lizviminda, gin-ako sang Singaporeans nga bisan nalutos sila sa mga Filipino, proud sila gihapon nga nakontra ang mga ini.
Bangud sang kadalag-an, magaderetso ang Negrense team sa World Series nga hiwaton sa Oregon , USA.
Sa pinakaulihi naman nga impormasyon nga nakuha sang Bombo Radyo, nag-champion man sa juniors division ang isa pa ka Negrense team.
Ila ginlutos ang kontra nga Australia sa score nga 10-0.
Nahibaluan nga ang Tanauan, Batangas naman ang nagarepresentar sang Pilipinas sa seniors division sang Asia Pacific Little League Softball Championship sa Singapore.
