Natalana nga ipresenta sang Negros Electric and Power Corp. (NEPC) sa Bacolod City Council ang ila detalyado nga plano sa masunod nga semana.
Sa interview sang Bombo Radyo kay Jonathan Cabrera, spokesperson sang NEPC, sa karun wala na sang lapnagon nga brownout kag isolated incident na lamang.
Suno diri, wala man sang problema sa Ten MegaVolt Amperes (10MVA) Mobile substation sa pagsupply sa Alijis Feeder 1 kag 3 apang naka-tie up sa gihapon ang iban nga feeders sa iban nga substation samtang ginahulat pa nga matapos ang pag-install sang 18 million MegaVolt Amperes nga transformer.
Ginalauman naman nga sa Setyembre 2 ukon 3 ma-energized na ang bag-o nga power transformer kag ma-amat-amat na diri takod ang iban nga Alijis feeders.
Samtang, plano man sang NEPC nga magbakal sang 50 MVA power transformer nga mas madako sang sa demand sang consumers para may yara sang allowance.
Apang, ini ang baklon pa sa luwas sang pungsod kag lauman nga maga-abot sa pila ka binulan pa.
Sa karun, pahayag ni Cabrera madamo sang subtsations ang naga-edad sang masobra sa 30 ka tuig na kag dapat na gid nga iupgrade.
Pahayag sini, ila igapresenta sa city council ang ila plano, phase by phase, month by month kag year by year.
Ila man ihatag sa mga pumuluyo ang ila timeline sa rehabilitation kag modernization.
Liwat man sini nga gin-athag nga indi madali ang ila pagtrabaho kag dapat tandaan nga lima ka tuig ang natalana nga tion para sa rehabilitation.
Samtang, magapatigayon naman ang National Grid Corporation of the Philippines (NGCP) sang 12 oras nga shutdown sang Bacolod-Reclamation 69kV Transmission Line sa Agosto 31, Sabado kag Bacolod-Alijis 69kV TL sa Setyembre 1, Dominggo, humalin alas- 6:00 sang aga tubtob alas- 6:00 sang gab-i.
