Ginalauman sang provincial administrator sang Negros Occidental nga ang probinsya na ang magapadalagan sa Negros First Cyber Center sa Enero 1, 2021 matapos gindesisyunan nga iterminate ang kontrata sini sa Negros Property Management and Development Corporation nga isa ka pribado nga kompaniya.
Sa interview sang Bombo Radyo kay Atty. Rayfrando Diaz, ginpahayag sini nga sang gintukod ang Negros First Cyber Center sang 2014, P607 million ang nagasto sang probinsya kun sa diin P450 million diri ang ginloan halin sa bangko.
Apang sa idalum sang pagdumala sang Negros Property Management and Development Corporation, indi makatrespaser ang income nga nagasulod sa P14 million loan amortization nga ginabayaran kada tuig sa bangko kag kun kaso, nagapanabon pa ang probinsya.
Suno sa iya, sa pila ka tuig nga operasyon, makabig nga pierde ang probinsya kag ini ang nagtulod nga iterminate ang kontrata sa pribado nga kompaniya.
Suno sa provincial administrator, nagpadala sila sang letter of intent kag wala man problema sa NPMDC.
Gindugang man sini sa sini nga semana, ginalauman nga magpatigayon sang pamulong-pulong ang mga negosyador, probinsya kag nasambit nga kompaniya agud iplastar ang transition sa pagdumala.
Suno kay Diaz, ang Economic Enterpise and Development Division sang probinsya ang magamanage sa Cyber Center agud wala na sang middle man sa tunga sang provincial government kag mga negosyador.
