Sarado sa karun ang capitol ground kag north capitol road kun sa diin ginadisplay ang mga organic kag agricultural products gikan sa Negros Occidental kag Negros Oriental sa pagselebrar sang Negros Island Farmers Organic Festival.
Magluwas diri, nag-upod man sa kahiwatan ang Slow Food Manufacturer, nga nagasaulog man sang ikaduha nga Slow Food Festival.
Ang aktibidad ang ginpangunahan ni Negros Occidental Governor Eugenio Jose “Bong” Lacson, kag nagtambong man si Bacolod City Mayor Alfredo “Albee” Benitez kag mga alkalde sa pila ka mga banwa kag ciudad sa probinsya.
Apisar sa prior commitment, wala nakadayun si Negros Oriental Governor Manuel “Chaco” Sagarbarria bangod sa emergency, apang ini ang nagpadala sang representative.
Nagserbe nga keynote speaker sa programa si Department of the Interior and Local Government (DILG) Assistant Secretary for Community and Participation Elizabeth de Leon.
Mensahe sini nga dapat buylugan ang tuman ka importante nag programa ilabi na nga ang Pilipinas ang agricultural country.
Nahibaluan nga ang Negros Occidental ang pinakauna nga probinsya nga nagpakilala sang organic farming sa Pilipinas.
Sa mensahe naman ni Governor Lacson, ginponto sini ang importansya sang paghugpong sang Negros Occidental kag Negros Oriental bilang agricultural provinces.
Humalin sang naumpisahan sang 1990s, yara na sa 5,547.03 hectares na sang kadutaan ang ginagamit sa organic farming.
Ini ang ginabug-usan sang 110 ka asosasyon nga ginalakipan sang 4,117 farmers.
Nagalaom si Lacson nga sa event, mas mapasanyog pa ang partnership sa mga stakeholders nga may kaangay nga passion.
Dugang pa sini nga sa paghugpong sa sustainable kag fair agriculture, maproteksyonan ang dunang manggad.
Ang lihok man suno diri ang rasun kun ngaa ang Negros Occidental ang nakabatun sang National Award bilang Top Performing Organic Agriculture Province.
Ang Negros Island Farmers Organic Festival ang nag-umpisa subong nga adlaw, kag matapos sa Sabado.
