Dako ang tsansa nga liwat nga mabalik ang Negros Island Region sa administrasyon ni President-elect Ferdinand “Bongbong” Marcos Jr., kag ginalantaw nga magaupod diri ang Siquijor.
Suno kay Provincial Administrator Atty. Rayfrando Diaz, may executive order na nga ginpagwa sadto sa idalum sang administrasyon ni late President Benigno Aquino III sang 2015 apang sang 2017, ini ang gindula ni Presidente Rodrigo Duterte.
Suno kay Diaz, bangud nga may EO na sadto kag may yara na sang blue print, dapat na lamang ini nga irevive kag pormal nga gamiton.
Suno sa iya, agud makaangkon sang budget, dapat naman ini nga mapasar bilang layi.
Nagapati ini nga mangin mahapos na lamang ang pagbalik sang NIR bangud siyam tanan ka mga kongresista sa probinsya nga ginalakipan sang anum nagikan sa Negros Occidental, isa sa Bacolod kag duha sa Negros Oriental ang nagfile sang House Bill 10534 nga liwat nga nagabuhi sang Negros Island Region.
Suno sa provincial administrator, mas mangin mahapos kun may NIR bangud mas makaangkon sang access sa mga regional agencies kag ang plano kag mga implementasyon sang proyekto ang magafocus gid sa Negros.
Una naman nga ginpahayag ni Bacolod City Mayor-Elect Alfredo “Albee” Benitez, nga nakigkita sang tinalikdan sanday President-elect Marcos Jr,. kag incoming Interior and Local Government (DILG) Secretary Benhur Abalos nga pabor sa mga ini ang liwat nga pagtukod sang NIR.
