Magluwas sa gindul-ong nga bulig pinansyal sang Office of the House Speaker, madamo man sang gintanyag nga bulig si Negros Occidental 2nd District Representative Alfredo “Thirdy” Marañon III sa pamilya Alacre.
Sa karun, kumpleto na ang pito ka nabilin nga mag-utod nga Alacre matapos makapauli na gikan sa Kuwait si Ailen Villarin kasunod sang pagkamatay ni Loreta Alacre sa kamot sang mga Hamas militants sa Israel.
Sa karun padayun pa nga ginahulat ang notice gikan sa Overseas Workers Welfare Administration (OWWA) kun san-o mahimo mabyahe pabalik sa Pilipinas si Lorie.
Kahapon, nag-abot sa puluy-an sang pamilya Alacre sa Cadiz Viejo, Cadiz City si Rizalino Roxasa, representative ni House Speaker Martin Romualdez nga naghatag sang P500,000 nga financial assistance sa pamilya.
Nagsugilanon man sa pamilya sanday Cadiz City Mayor Salvador “Bading” Esacalante kag Negros Occidental 2nd District Representative Thirdy Marañon.
Sa interview sang Bombo Radyo Bacolod kay Marañon, kahapon nagdaho man ini sang burial assistance para sa nalisdan nga pamilya.
Bangod nahibaluan nga may duha ka hinablos nga ginapa-eskwela si Lorie, ginpahayag sang Kongresista nga ipasulod sini ang mga kabataan sa programa nga nagahatag sang financial assistance sa mga estudyante sa 2nd District.
Magluwas sa pagbulig sa pamilya Alacre, ginapa-account naman ni Marañon kung pila tanan ang mga overseas Filipino workers (OFWs) sa 2nd District nga yara pa sa karun sa Israel.
Suno diri iya man ang mga ini pagabuligan hinali nga luyag magpauli sa Pilipinas.
Apang ginahatag na sini ang desisyon sa mga OFWs, bangod aminado ang kongresista nga may iban man nga bahin sang Israel nga indi dako ang risgo.
Apang sa tion nga peligroso na ang ila sitwasyon, ginapanugyan ni Marañon, nga magpauli na sa Pilipinas.
Pangabay sang konsehal nga indi na maglala pa ang sitwasyon sa Israel ukon diin man nga bahin sang kalibutan.
