Nagpanawagan si Negros Occidental Fourth District Congresswoman Juliet Ferrer sa bilog nga miyembro sang Sugar Regulatory Administration Board nga magresign sa ila mga position kadungan sang ginpatigayon nga committee briefing sang Committee in Agri and Committee on Good Government tuhoy sa Sugar Order No. 4 kahapon pinaagi sa Zoom.
Sa interview sang Bombo Radyo kay 5th District Congressman Dino Yulo, kaupod sini nga nagtambong sa briefing si Ferrer, Congressman Joseph Paduano, Congressman Thirdy Marañon kag Congressman Kiko Benitez.
Suno kay Yulo, technically indi matawag nga hearing ang ila ginhiwat kahapon kundi briefing.
Suno sa iya, ginduso ni Congressman Paduano nga himuon nga inquiry ang hearing kun sa diin dapat physically present ang mga resource persons bangud kun kaangay ang sitwasyon kahapon nga via zoom, indi nila mapunterya ang issue.
Ini agud man sarang sila nga makapamangkot sang asod-asod kag mangin accountable ang mga resource persons nga magsabat.
Kahapon, naghatag lamang sila sang detalye kag may briefing sa liwat nga patigayunon sa Huwebes apang sa masunod nga semana pa ang formal inquiry.
Suno sa kongresista, nagpanawagan si Congresswoman Ferrer sa bilog nga SRA board nga magresign.
Sa karun suno sa iya, magluwas kay Department of Agriculture Undersecretary Leocadio Sebastian, nagresign naman kahapon si Atty. Roland Beltran bilang board member sang SRA.
Nagpasalig naman si Yulo sa mga pumuluyo ilabi na sa mga sugar producers nga pagadal-un sang mga kongresista sa Negros ang issue sa kalamay bangud nakahibalo sila nga kinahanglan nga proteksyunan ang industriya nga nagabulig sa probinsya.
