Imbes nga magtambong sang Congressional Hearing, ginpili ni Negros Occidental 5th District Representative Atty Dino Yulo nga mag-upod kay Department of Social Welfare and Development (DSWD) Secretary Rex Gatchalian sa pagpadulong sa mga apektado sang explosive eruption sang Bulkan Kanlaon.
As of 9:00 am ang evacuees sa banwa sang La Castellana ang nagdangat na sa 7,983 individuals ukon 2,455 ka pamilya, kag suno sa Kongresista ini ang magasaka pa bangod padayun pa nga ginatinguhaan nga mapapanaog ang iban nga pumuluyo.
Ini bangod may mga persona partikular na mga amay sang panimalay nga indi luyag biyaan ang balay ukon kasapatan nga wala sang tawo.
Panawagan sini sa mga yara pa sa ibabaw nga magpanaog na bangod indi mapaktan kun natapos na ang pag-alburuto sang bulkan ukon ini ang liwat pa nga magalupok.
Aminado si Yulo nga mas mabaskog ang karun nga paglupok kun ipaanggid sang tinalikdan nga Hunyo.
Sila ang nagbisita sa mga evacuees gikan sa Bago City, La Carlota City kag banwa sang La Castellana.
Ang water filtration jug nga dala ni Gatchalian ang may capacity naman nga 20 liters kada adlaw.
Madumduman nga sang tinalikdan nga Hunyo, may-ara sang tubig nga gindeliver nga wala nakapasar sa standard kag nagtuga sang paglain sang tiyan sang mga evacuees.
Sa pihak nga bahin, lab-uton man ni Yulo ang Department of Trade and Industry para sa mga gina-alegar tuman ka mahal nga pagbaligya sang facemask.
Sa impoirmasyon nga nabatun sang Bombo News Team, ang P5 nga facemask ang ginabaligya na sa P30 sa tindahan sa Bago City.
