Ginpasalamatan naman sang kongresista nagikan sa 5th District sang Negros Negros Occidental nga nangin layi na ang Negros Island Region Bill matapos nga ginpirmahan ni President Ferdinand “Bongbong” Marcos Jr., kahapon.
Sa interview sang Bombo Radyo Bacolod kay Congressman Atty. Dino Yulo, nagapasalamat ini sa presidente sa pagpirma agud nga mangin layi ang nasambit nga hagna kasubong man sa mga nagsuporta agud nga matuman ang madugay na nga ginaduso nga Negros Island Region.
Suno kay Yulo, bangud layi na ang Negros Island Region Bill dako ini nga bulig sa mga pumuluyo bangud indi na ang mga ini mabudlayan nga makakuha sang serbisyo sang gobyerno.
Sadto pa man nga executive order pa lamang ang Negros Island Region makita nga halos tanan ang nakabenepisyo.
Nagalaom si Yulo nga mahitso na ang Implementing Rules and Regulation sang Republic Act (RA) 12000 ukon ang NIR Act agud nga malakip na ini sa National Budget para sa 2025.
Nagapati man ini ang pagpatuman sang nasambit nga layi nga makabenepisyo diri sang dako ang mga residente sang 5th District.
