Nakit-an sang Russian Ambassador to the Philippines Igor Khovaev nga dako ang potensyal sang turismo sang Negros Occidental sa merkado sang Russia.
Kahapon nagcourtesy call kay Gov. Alfredo Marañon Jr. si Khovaev upod ang iya First Secretary nga si Dmitry Larionov sa Provincial Capitol.
Kadungan sang panyaga sini upod sa gobernador, ginpalab-ot sini nga isa ang manamit nga pagkaon sang probinsiya sa makaganyat sa mga Russians nga magpadulong sa Negros Occidental.
Suno sa ambassador, kun magbyahe ang mga Russians madugay ang ila ginatiner sa isa ka lugar, upod man ang ila pamilya kag nakahibalo magrespeto ang mga ini sang local history kag dako man kun mag gasto gani maayo ang epekto sini sa ekonomiya.
Suno kay Amb. Khovaev, kada tuig masobra sa 20 millions Russians ang nagabyahe sa iban nga bahin sang kalibtan partikular sa tropical countries.
Nagligad nga tuig, masobra isa ka milyon nga Russians ang nagpadulong sa Thailand, 500 mil sa Vietnam apang 40 mil lang ang nagbisita sa Pilipinas.
Santo man sa Statistics, sang 2017, 1.7 million ang tourist arrivals sa Negros Occidental kun sa diin 5,303 diri mga Russians.
Ginpasalig sang ambassador kay Gov. Marañon nga magaganyat ini sang atensyon para sa Negros Occidental ilabi na ang mga investors kag gin-imbetar man niya ini nga magtambong sa Tourism Fair and Exhibition sa Russia agud nga ma-promote pa sini ang probinsiya.
Dugang pa ni Amb. Khovaev, indi mahilig magyuhom ang mga Russians apang natapikan siya sang “smile virus” sa Pilipinas kag suno diri, kun magyuhom ang mga Ruso, sinsero ang mga ini.
Ginpasalamatan man ni Gov. Marañon ang Ambassador kag iya man ginpalab-ot diri nga madamo sang matahom nga marine resources ang Negros Occidental.
