BACOLOD CITY — Ginaplano ni Department of Agriculture Secretary Manny Piñol nga himuon ang Negros Occidental nga pilot area nga magapatuman sang ‘Bigas ng Masa Program’ nga magabaligya sang commercial rice sa bili nga indi maglapaw sa 40 pesos kada kilo.
Sa Facebook post ni Piñol matapos ang iya pagbisita sa Negros Occidental sang weekend, ginpabutyag sini kay Provincial Agriculturist Japhet Masculino ang iya plano nga imaximize ang paggamit sang Negros First Rice Processing Center sa ciudad sang Bago paagi sa pagturn-over sini sa kooperatiba sang mga mangunguma.
Nahibaluan nga sa karon, ang Rice Processing Center ang ginadumalahan sang provincial government bilang isa ka economic enterprise.
Sa tion nga maturn-over na ini sa farmers cooperative suno sa tiglikom, hatagan sila sang 20 milyones pesos nga loan paagi sa Agricultural Credit Policy Council sang DA agud nga makahatag sang member production loans sa idalom sang Production Loan Easy Access Program.
Ang patubas nga humay suno kay Piñol ang pagagalingon sa processing center kag igabaligya sa ‘Bigas ng Masa’ outlets nga pagatukuron sang provincial government sa tanan nga mga banwa sa Negros Occidental.
Sa idalom sang ‘Bigas ng Masa’, igabaligya ang bugas sa bili nga indi maglapaw sa 40 pesos kada kilo.
