Wala nalab-ot sang probinsya sang Negros Occidental ang target nga 5,000 ka mga persona nga makuhaan sang swab kadungan sang mass testing sang Agosto 30 tubtob Agosto 31.
Madumduman nga apat ka mga local government units sa probinsya ang nagpatigayon sang mass testing sa idalum sang “O-Plan: One-Time Bigtime” program sang Provincial Government sang Negros Occidental.
Ini ang ginalakipan sang ciudad sang Talisay kag Silay nga natigayon sang Agosto 30 kag ciudad sang Bago kag banwa sang Murcia nga natigayon sang Agosto 31.
Suno sa data sang probinsya, 725 ka mga specimen ang nakolekta sa Talisay City; 431 sa ciudad sang Silay; 318 sa Bago City; kag 436 sa banwa sa Murcia. Sa kabug-usan, nagdangat lang sa 1,910 ka mga persona ang nagpakigbahin sa mass testing sa bilog nga probinsya.
Samtang, ginkumpirmar ni Atty. Rayfrando Diaz nga ang duha ka swab collection booth nga gindonar sang Department of Science and Technology sa Negros Occidental ang igabutang sa Provincial Health Office.
Suno kay Diaz, luyag ni Governor Eugenio Jose “Bong” Lacson nga isaylo ang nasambit nga swab collection booth sa Nompac Gym nagikan sa Benjamin Hall.
Suno sa iya, ini agud makapatigayon sang drive through swab testing kun sa diin sarang nga makapakuha sang RT-PCR test ang mga pumuluyo nga nagalabay.
Apang suno diri, indi pa ini final bangud inisyal pa lang ini nga plano sang gobernador.
