Magadihon ang probinsya sang Negros Occidental sang energy road map sa tinutuyo nga makaangkon sang energy security ang probinsya.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, natigayon ang Memorandum of Agreement (MOA) signing sa tunga sang probinsya kag sang University of St. La Salle matapos nga ang nasambit nga unibersidad ang magahimo sang energy road.
Suno kay Lacson, ang nasambit nga unibersidad ang mangin partner sang probinsya sa energy security nga nagikan sa academe.
Ginpahayag sang gobernador nga agud nga mahatagan sang pagtamod ang energy security, kinahanglan nga magsaylo sa renewable energy kag nahibaluan naman nga ang probinsya sang Negros Occidental ang isa hosts sang pinakadako nga solar plant sa Pilipinas.
Ginalantaw nga sa Pebrero ukon Marso mapatigayon ang probinsya kag ang University of St La Salle sang aktibidad nga may kaangtanan sa energy road map kaangay lamang sang renewable energy week.
Isa sa mga tinutuyo sang probinsya nga maangkon ang energy security ang bangud sa mga investors.
Suno kay Lacson, isa sa mga ginalantaw sang mga investors antes mag-invest amo ang sitwasyon sang electricity sa isa ka lugar gani kinahanglan ang energy security agud nga magdamo ang investors kag magasanyog pa ang probinsya.
