Pormal na nga ginbuksan kahapon ang 27th Panaad sa Negros Festival 2023 sa Panaad Park and Stadium sa Barangay Mansilingan, Bacolod City matapos ang tatlo ka tuig nga wala ini ginpatigayon bangud sa Covid-19 pandemic.
Ginpangunahan ni Negros Occidental Governor Eugenio Jose “Bong” Lacson ang opening sang festival.
Nangin dinapit nga bisita amo sanday Tourism Secretary Christina Garcia-Frasco, Senator Christopher “Bong” Go kag Senator Francisco Tolentino.
Yara man ang presensya ni Negros Occidental Vice Governor Jeffrey Ferrer kag Negros Occidental Provincial Administrator Atty. Rayfrando Diaz.
Nagtambong man ang mga alkalde kag bise alkalde sang mga local government units sang probinsya.
Antes ang opening program kahapon sang hapon, ginpatigayon ang thanksgiving mass sa park stage.
Ginpatigayon man ang ribbon-cutting ceremonies sa Best of Negros Products Trade Fair, Food Alley, Livelihood Village, Bamboo Negrense Village, kag Animal Exhibit Area.
Ginblessingan man kag gin-inaugurahan ang Provincial Animal Learning Park and Hospital, kag ang Abanse Negrense Integrated Laboratory.
Dululungan man nga ginbuksan kahapon sang aga ang all themed-pavilions sang 32 ka participating local government units.
Una na nga nakabaton ang participating local government units P300,000 kada isa nagikan sa provincial government para sa ila nga respective pavilions.
May yara man sang ginpatigayon nga motorcade halin sa Provincial Capitol Grounds padulong sa Panaad Stadium nga ginsundan sang grand opening ceremony sa Panaad Stadium alas 4:00 ang takna kahapon sang hapon.
Nangin host sa opening ceremony ang celebrity nga si Robi Domingo.
Nagdisplay man ang tanan nga mga participating LGUs sang ila mga ginapabugal nga mga produkto sa tagsa nila ka mga pavillion.
Samtang, ginpangabay man ni Negros Occidental Governor Eugenio Jose “Bong” Lacson sa iya nga opening message kadungan sang pormal nga pagbukas sang 27th Panaad sa Negros Festival kahapon, ang mga bisita nga suportahan ang mga MSMEs nga nakigbahin sa pagsaulog sang nasambit nga festival.
Sa mensahe ni Governor Lacson, ginpasalamatan sini ang tanan ang Ginoo sa ginhatag nga kahigayunan agud nga liwat nga makatipon kag maselebrar ang Panaad sa Negros Festival 2023.
Ginpasalamatan man sini ang tanan nga mga Local Government Units sa probinsya kalakip na ang syudad sang Bacolod nga naghatag sang suporta sa probinsya sa pagpatigayon sang nasambit nga kapiyestahan.
Suno diri, ini ang una nga kahigayunan nga ginselebrar ang nasambit nga festival sa idalom sang iya nga administrasyon bangud tatlo man ka tuig nga wala nakaselebrar ang probinsya sang Panaad sa Negros bangud sa Covid-19 pandemic restrictions.
Suno sa gobernador, subong nga selebrasyon sang nasambit nga festival ang nagapakita lang sang kabakod sang mga Negrosanon sa pihak sang pagpanghangkat nga ginpangatubang sini.
