Mangin si Negros Occidental Governor Eugenio Jose ‘Bong’ Lacson ang nagapati nga wala sang shortage sang kalamay sa probinsya kag sa bilog nga pungsod.
Suno sa gobernador, available man gihapon ang kalamay sa merkado.
Aminado ang gobernador nga mga trader ang nagaginansya sa karon bangud ang kalamay ang wala na sa kamot sang mga planter bangud madugay na ini nabaligya.
Ginalantaw ni Lacson nga mahimo nakita ni Presidente Marcos nga indi naman kinahanglan nga mag-import gani iya ginbasura ang importation proposal ilabi na nga nagsugod na ang milling season.
Suno kay Lacson, wala ginabalabagan ang importasyon sang kalamay apang dapat patigayunon ini sa husto nga timing.
Sa karon, kalabanan nga produksyon sang kalamay ang para sa domestic use kag pila na ka tuig nga wala na nagaimport sa Estados Unidos bangud sa kakulang sang supply.
Kada tuig suno sa gobernador, nagaimport ang Pilipinas sang kalamay kun kulang na ang imbentaryo.
Aminado ang opisyal nga yara na sa national officials ang pagmandu kun kinahanglan buksan ang mga bodega agud mahibaluan kun may supply pa ukon may hoarding.
Indi mahambal ni Lacson kun artificial ang shortage sa karon apang ginalantaw man sini nga may iban pa nga factor nga nagaapekto diri kaangay sang pagsaka sang presyo sang gatong.
Suno kay Lacson, wala sang ganar ang mga planter sa pagmahal sang presyo.
Nagbalibad naman ini nga magspeculate kun ano ang rason ni SRA Administrator Herminigildo Serafica sa pagduso sang importasyon.
Suno kay Lacson, ila ginaduso nga Negrosanon kuntani ang magapungko bilang administrator sang Sugar Regulatory Administration bangud madugay naman ang pagserbe niya sa SRA.
Hulaton naman sang gobernador kun sin-o ang ibutang niya bilang pinuno sang SRA.
Suno kay Lacson, nakahatag sang rekomendasyon si Vice Governor Jeffrey Ferrer bilang personal adviser ni President Bongbong Marcos gani hulaton nalang kun ano ang desisyon sini.
