Nagapati si Negros Occidental Governor Eugenio Jose “Bong” Lacson nga dako ang mangin benepisyo sa turismo sang probinsya ang pagtukod sang Panay-Guimaras-Negros Bridge.
Sa interview sang Bombo Radyo kay Lacson, ginakabig sini nga maayo nga balita ang anunsyo sang National Economic and Development Authority (NEDA) Board nga pagasuguran ang construction sang P189.53 billion nga Panay-Guimaras-Negros (PGN) Island Bridges Project sa 2025 kag ginalauman nga matapos sang 2030.
Suno kay Lacson, magluwas sa pagsolbar sang problema sa transportasyon, dako ang mabulig sang taytay sa pagpasanyog sang tourisma sang imbolbado nga mga probinsya.
Suno diri, mas mapadasig ang pagpadulong sang mga pumuluyo sang Negros Occidental kag Negros Oriental sa Boracay Island kag ang mga taga Panay ang sarang naman nga makakadto sa mga beach sa Negros Island.
Suno kay Lacson, kun magadamo ang bisita sa Negros, magasanyog man ang ekonomiya sang probinsya.
Luyag lamang mahibaluan sang gobernador kun diin magahalin ang pondo sang bridge.
Luyag sini mahatagan sang pagpaathag kun ang pondo sang Panay-Guimaras-Negros Bridge ang magagikan sa gobyerno ukon Public–private partnership.
