Nagapati ang gobernador sang Negros Occidental nga ginahimo sang mga atleta sang probinsya ang ila nga best agud makuha ang general championship sa 2025 Western Visayas Regional Athletics Association Meet (WVRAA 2025) sa Antique.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, ini na ang ulihi nga partisipasyon sang Negros Occidental sa WVRAA bangod sa masunod nga tuig ang probinsya ang kabahin na sang Negros Island Region Athletics Association (NIRAA).
Suno sa gobernador, abanse ang mga atleta sang probinsya sa medal standing sang una nga duha ka adlaw, apang sa ikatatlo nga adlaw nalagas sang Iloilo ang Secondary category.
Apang pasalig sini nga madamo pa sang masunod nga hampang nga makahatag sang medalya agud liwat nga maka-abanse ilabi na nga dikit ang kompetisyon kag gamay lamang ang deperensya sang nahakot nga medalya.
Nakita man ni Lacson nga dako ang improvement sa hampang sang mga players kun ipaanggid sang tinalikdan nga WVRAA competition.
