Nagpanawagan ang gobernador sang probinsya sang Negros Occidental sa mga pumuluyo nga ugyunan ang ginapatuman nga Modified Enhanced Community Quarantine sa syudad sang Bacolod.
Sa press conference ni Governor Eugenio “Bong” Lacson, ginpahayag sini nga kun wala man lang sang importante nga hilikuton ang mga pumuluyo sang probinsya, indi na magpadulong sa syudad sang Bacolod bangud yara ini sa MECQ kag indi man sila gihapon pagpahanugutan nga makasulod.
Suno kay Lacson, kun mangin madinalag-on ang syudad sang Bacolod sa pagpakigbato sa COVID-19, dako man ang mabulig sini sa probinsya sang Negros Occidental.
Samtang, gamiton naman sang mga empleyado sang provincial capitol ang mga salakyan sang tagsa ka mga opisina sa kapitolyo kag nakadepende na sa mga department heads ang arrangement sang pagsugat kag pagdul-ong sa mga empleyado.
Suno sa gobernador, indi man ini bag-o para sa ila bangud naagyan naman nga wala sang masakyan ang mga empleyado sadtong ginpaidalom man sa Enhanced Community Quarantine ang syudad.
