Nagpanugyan liwat ang gobernador sang Negros Occidental sa mga residente ilabi na ang mga nagapuyo sa banwa sang La Castellana nga mangin alerto kag mabinantayon ilabi na sa panibag-o nga aktibidad sang Bulkan Kanlaon.
Kahapon, nakarecord ang Philippine Institute of Volcanology and Seismology (PHIVOLCS) sang 288 Volcano Tectonic (VT) earthquake.
Samtang nagsaka sa 9,985 tonnes sang asupre ukon volcanic sulfur dioxide ang ginapagwa sang Bulkan Kanlaon.
Suno kay Negros Occidental Governor Eugenio Jose “Bong” Lacson, ang PHIVOLCS wala gid ginapanubuan ang Alert Status sang Bulkan Kanlaon bangud ang mga aktibidad sini ang mahimo makatuga sang eruption.
Suno kay Lacson, ang bulkan ang nagapabilin sa Alert Level 2 kag ginapaaligmat ang tanan nga yara sa malapit sa 4-kilometer permanent danger zone sang Bulkan Kanlaon.
Suno sa gobernador, ginapasiguro man niya sa La Castellana Municipal Disaster Risk Reduction and Management Office (CDRRMO) nga wala na sang residente nga yara sa 4-kilometer permanent danger zone sang Bulkan.
Nagpasalig man ang gobernador nga ang probinsya ang nakahanda nga magbulig inkaso nga may ipatuman nga force evacuation.
Nahibaluan, ginsuspend na ang tanan nga klase sa banwa sang La Castellana bangud sa liwat nga pagbuga sang aso nga mahimo patimaan sang liwat nga paglupok sang Bulkan.
