Nagpasalig ang provincial sports coordinator sang Negros Occidental nga handa na ang probinsya sa pag-host sang Western Visayas Regional Athletic Association (WVRAA) Meet 2024 humalin sa Mayo 2 tubtob Mayo 7.
Sa interview sang Bombo Radyo Bacolod kay Romeo Sison, nakaligad nga semana gintsektyar na ang mga billeting venues kag sports venues sa ciudad sang Bacolod kag iban pa kaangay sang Silay kag Talisay City, kasubong man sa San Carlos City.
Anum tanan ka mga probinsya ang magapasakop sa WVRAA kag sila ang may natalana na nga billeting quarters.
Ang probinsya sang Iloilo nga ang billeting quarters sa Andres Bonifacio Elementray School 1 and 2; probinsya sang Aklan sa Bacolod City National High School; Antique sa Mansilingan Agro-Industrial High School; Capiz sa ETCS 1, 2 and 3; kag Guimaras sa Bata Elementary school 1 and 2, kag Negros Occidental sa Negros Occidental High School.
Suno kay Sison, ila ginahatagan sang pagtamod ang supply sang tubig para sa mga delegates.
Ginalauman naman nga maga-abot ang delegasyon sa Abril 27 tubtob Abril 29.
Ang outdoor games ang maga-umpisa alas-5:00 tubtob alas-9:00 sa aga kag magaresume alas-4:00 sa hapon pasaka.
Sa Elementary may-ara sang 15 ka mga sporting events, samtang 22 naman sa High School category.
Samtang may-ara man sang Para-Games para sa mga persons with disability (PWD).
Samtang, may yara naman ang ginapa-abot nga duha ka Department of Education undersecretary ang magatambong sa opening ceremony sa Mayo 2, alas-5:30 sang hapon sa Panaad Park and Stadium.
