Nagahingyo ang Negros Occidental Historical Council kay Bacolod City Mayor Greg Gasataya nga kakason ang light balls nga ginbutang sang Tourism Infrastructure and Enterprise Zone Authority (TIEZA) sa Bacolod City Public Plaza.
Sa interview kay Bacolod City Mayor Greg Gasataya, bukas siya sa mga suhestyon kag rekomendasyon agud mapaayo ang disenyo sang plaza, kalakip ang posibilidad nga pagkakas sang pila ka elemento.
Suno kay Gasataya, pagkatapos sang MassKara Festival, magapungko liwat ang ciudad kaupod ang TIEZA agud ipresentar liwat ang mga plano para sa konsiderasyon sang ahensya kag para sa development sang plaza.
Nahibaluan nga nagpalapit ang NOHC sa alkalde sa tion sang installation sang bag-o nga marquee sang Tindalo tree sa plaza, kun sa diin ila ginpabutyag ang pagkadismaya sa itsura sang plaza.
Suno sa NOHC, wala sang cultural significance ang mga lighted balls sa disenyo kag kasaysayan sang plaza kag ila ginhingyo ang alkalde nga sayluhon na lamang sa lugar kun sa diin ini mas nagakabagay.
Nagpahayag man sila sang kabalaka sa posible nga safety hazard nga mahimo sini sa mga nagabisita sa Bacolod Public Plaza.
