Nagpanindugan ang gobernador sang probinsya sang Negros Occidental nga indi pa masunod ang bag-o lang ginpagwa sang Department of Health nga Department Memorandum No. 2020-0258 nga gin-endorso sang clinical practice guidelines kag technical advisory groups nga ang mga pasyente nga may mild ukon wala sang sintomas ang mahimo na matag nga nakarecover matapos ang katorse ka adlaw humalin sang pagpakita sang sintomas ukon ang petsa sang specimen collection.
Ginapakita man sa karun nga polisa nga sa ika-napulo nga adlaw sang pagmasakit, ang risgo sang paglaton sang virus sa iban nga tawo ang manubo na.
Ini nga clinical recovery protocol ang ginasunod sang US Centers for Disease Control and Prevention, European CDC, kag India.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, aminado ini nga siya mismo ang nakibot sa recovery rate sang pungsod sang Covid-19 kahapon nga naglapaw sa 38 mil.
Indi man sini mapat-od kun frustrated lang ang sa Department of Health sa pagpagwa sang nasambit nga datos.
Suno kay Lacson, kuntani sang una pa ini napinsaran sang ahensya agud wala na naggasto ang probinsya sang minilyon ka pesos sa pagquarantine kag pagswab sa mga Locally Stranded Individuals (LSI’s) kag returning Overseas Filipino Workers (OFW) nga asymptomatic apang nagtinir sa quarantine facilites samtang nagahulat sang resulta.
Apang suno kay Lacson, magapabilin ang probinsya sa kun ano ang ginapractice subong tubtob may kompirmasyon na nagikan sa health experts nga hilway na ang pagpractice sa bag-o nga health protocol.
