Ginpaidalom sa blue alert status ang probinsya sang Negros Occidental kasunod sang pagsulod ni Bagyo Ursula sa Philippine Area of Responsibility kun sa diin yara na sa tropical storm signal number 1 ang Negros Occidental.
Sa memorandum order nga ginpirmahan ni acting governor Jeffrey Ferrer, ginmanduan sini ang tanan nga mga city kag municipal disaster risk reduction and management council nga magpatigayon sang proactive preparedness kag precautionary actions sa posible nga pagbaha kag landslides.
Sa interview sang Bombo Radyo Bacolod kay Provincial Disaster Managment Program Division head Dr. Zephard Gerhart Caelian, ginpaidalom man sa white alert status ang mga district kag provincial health office agud mapasiguro ang kahandaan sang medical kag health personnel.
Dugang pa sini, handa sila nga magpatigayon sang pre-emptive evacuations kun kinahanglanon.
Nagpangabay man si Caelian sa publiko nga mangin handa ano man nga oras kag magpangamuyo gid.
Nagpapanaog man sang memorandum si Bacolod City Mayor Evelio “Bing” Leonardia nga nagapaidalom sa ciudad sang Bacolod sa blue alert status.
Nakabutang sa memorandum nga ginamanduan niya ang city disaster risk reduction and management office subong man ang mga barangay officials kag allied agencies sang Bacolod City nga magpatigayon sang hightened alert status 24/7.
Natalana naman nga magsapol subong nga adlaw ang Bacolod City disaster risk reduction and management council nahanungod sa pagpanghanda kay Bagyo Ursula.
Pagatambungan ini sang Department of Social Services and Development, Response Cluster, nagkalain-lain nga rescue groups, barangay officials kag iban pa.
