Ginpakigbahin sang gobernador sa probinsya sang Negros Occidental nga maayo ang performance sang probinsya may kaangtanan sa COVID-19 vaccination nga nagadangat ang average sa 94 porsyento.
Padayun naman nga ginapanugyan ni Lacson sa tagsa ka mga health officer sa mga local government units (LGUs) nga ipanugyan sa mga residente ang pagpabakuna ilabi na sa mga nakaschedule.
Nagapati naman si Lacson nga kun pahanugutan ang pagbakuna sa A4 categories, mas magadamo pa ang mga mabakunahan sa probinsya sang Negros Occidental.
Ginalantaw naman sini nga madamo sa mga pamatan-on ang willing magpabakuna ilabi na sa mga nagatrabaho kaangay sa mga Business Process Outsourcing (BPO) employees.
Paathag ni Lacson nga sa karun, wala pa ginapahanugotan sa pagbakuna sa A4 sector ang Negros Occidental indi kaangay sa Bacolod City nga napahanugutan na sa pagbakuna sa A4 kag A5 sector bangod nalakip sa NCR Plus nga prayoridad sa vaccination.
Sa karun, nagapabilin gihapon sa A1 tubtob A3 ang vaccination program sang probinsya apang ginapasanyog nalang ini agud mas madasig nga malab-ot ang 70 porsyento sang populasyon ukon herd immunity.
Pahanumdom naman ni Lacson nga dako ang mabulig sang fully vaccinated individual indi lang sa pagprotekta sa kaugalingon, kasubong man mangin mahapos ang pagbyahe.
Apang panugyan sang gobernador, nga bisan wala sang plano nga magbyahe, kun nakaschedule na sa vaccination, dapat man nga magpabakuna kasubong man ang pagpabakuna para sa 2nd dose.
