BACOLOD CITY — Nagapanguna man ang Negros Occidental sa mga probinsya sa Western Visayas nga may pinakamadamo nga kaso sang dengue kag numero sang patay bangud sa amo nga balatian subong nga tuig 2018.
Ini ang santo sa monitoring sang Department of Health Region 6 humalin sang Enero 1 tubtub Hulyo 21, 2018.
Sa interview sang Bombo Radyo Bacolod kay Dr. Rosemarie Lamirez, medical coordinator for emerging and re-emerging infectious diseases sang DOH Region 6, ginpahayag sini nga nagalab-ot sa 5, 506 ang kabug-usan nga dengue cases sa bilog nga Western Visayas kag 36 ang ginbawian sang kabuhi.
Suno kay Lamirez, nagadangat sa 2, 405 ang dengue cases sa Negros Occidental kag 22 ang patay.
Sa ciudad sang Bacolod, may yara sang 405 ka kaso sang dengue kag tatlo ang patay.
Ang probinsya sang Aklan ang nakarekord sang 695 cases kag duha ang patay; ang Antique may 323 cases kag tatlo ka patay; samtang ang Capiz may yara sang 338 cases kag tatlo ka patay.
Ang Guimaras may yara sang 55 cases kag wala sang patay; 595 sa Iloilo Province kun sa diin duha ang patay; samtang 176 naman sa Iloilo City nga may isa ka patay.
Magluwas diri, may 64 ka iban pa nga persona nga indi taga-Western Visayas apang diri nakaangkon sang dengue kag isa ang napatay.
Sa pihak sang mataas nga dengue cases sa Negros Occidental, wala pa ini nakalab-ot sa epidemic threshold kag alert level, suno kay Lamirez.
