Kadungan sang selebrasyon sang ika-122 ka tuig nga liberalisasyon sang Negros Occidental ukon Cinco de Noviembre, nagalaom si Governor Eugenio Jose “Bong” Lacson nga mag-ugyon ang tagsa-tagsa agud madaog man ang gyera sa karun nga ginapangatubang indi lang sang probinsya kundi sang bilog nga kalibutan.
Ini ang pagpakig-away sa COVID-19.
Sa mensahe nga ginpagwa sang gobernador subong nga adlaw, gindumdum sini ang kaisog kag kaalam sang mga Negrense nga baganihan kag ginpabutyag ang iya pagpasalamat sa ginaagom sa karun nga kahilwayan.
Suno kay Lacson, kaangay sang sitwasyon sang una, nagapangatubang man ang mga tawo sang giyera apang indi sa karun makita ang kontra.
Suno diri, agud nga mag-untat ang pagpanglutos sang coronavirus kag paglapta sini, kinahanglan ang pagpugong sa kaugalingon, displina kag pagpaninguha.
Nagalaom man ini nga mag-isa ang mga pumuluyo agud malab-ot ang kahilwayan sa virus.
Bangud sa ginapangatubang nga pandemic, wala sang hiwaton nga maskin ano nga programa sa Provincial Capitol, samtang magahalad naman sang bulak kag flag raising ceremony ang ciudad sang Bago.
May gamay naman nga programa nga pagahiwaton ang ciudad sang Silay kag magapatigayon man sang flag raising ceremony.
