Nagapabilin ang probinsya sang Negros Occidental sa nagasagod sang maayo nga kalidad sang baboy kag nagapanguna nga ginabaligyaan sini ang Luzon.
Humalin sang gin-ban sang probinsya sang Cebu ang baboy nagikan sa probinsya, ang Luzon market na ang nagakuha sang supply sang baboy nga nagilkan sa Negros Occidental.
Sa pinakaulihi nga data nga ginpagwa sang Provincial Veterinary Office sa sulod sang 20 ka adlaw, March 7 tubtob 27 nakaship-out ang probinsya sang kapin 2,126 ka buhi nga baboy kun sa diin 1365 diri ang nagkadto sa Luzon, 641 sa Visayas kag 120 sa Mindanao.
Sang Enero, 4303 naman ka buhi nga baboy ang naship-out sang probinsya padulong sa Luzon, Visayas kag Mindanao.
Sang bulan sang Pebrero, nagdangat naman sa 2765 ka buhi nga baboy ang naship-out halin sa probinsya padulong sa Luzon, Visayas kag Mindanao kag may yara man sang ginapadala sa probinsya sang Negros Oriental.
Suno kay Negros Occidental Provincial Administrator Atty. Rayfrando Diaz, nagapadayon ang Negros Occidental sa pagpasanyog sang hog industry kag pagproduce sang maayo nga kalidad sang baboy nga ginabaligya sa pila ka bahin sang Negros Occidental.
Suno kay Diaz, padayon man nga ginapatuman sang probinsya ang hugot nga biosecurity measures agud nga wala sang makalusot nga infected sang ASF.
Ginadihon naman sa karun sang probinsya nga makakuha sang level 2 accreditation ang Provincial Veterinary Office agud nga magbutangan sang RT-PCR ang laboratory nga ginagamit sa pagdetect sang ASF kag amo man ang Elisa machine nga ginagamit sa pagdetect sang Avian Influenza ukon birds flu agud nga mapabilin nga hilway sa nasambit nga mga balatian ang probinsya sang Negros Occidental.
Nagpanawagan man ini sang kooperasyon sang mga pumuluyo nga magsunod na lamang sa pagsulundan nga ginapatuman sang probinsya batok sa ASF kag bird flu.
