27 na ang bulawan nga medalya sang Negros Occidental sa elementary category, 47 sa Secondary level kag siyam sa Paragames sa nagapadayon nga Western Visayas Regional Athletic Association (WVRAA) Meet 2023 sa probinsya sang Aklan as of 5:00 pm, kahapon.
Ang probinsya ang may 28 naman ka mga silver sa Elementary category, 51 sa Secondary kag 21 sa Paragames.
May yara sang 23 ka bronze ang Negros Occidental sa Elementary category, 46 sa Secondary kag anum sa Paragames.
Sa interview sang Bombo Radyo Bacolod kay Romeo Sison, Division Sports Officer sang DepEd Division-Negros Occidental, magatakop karun sa hapon ang Western Visayas Regional Athletic Association (WVRAA) Meet 2023, kag amo na nga mahibaluan ang kampeonato.
Suno diri, santo sa result sang mga games, nakaperform ang mga athletes sang maayo kag ila ginhatag ang ila kasarang.
Apang, sa karun yara sa 50-50 ang tyansa sang probInsya sang Negros Occidental bilang kampeonato sa WVRAA 2023.
Apang, suno kay Sison, samtang wala pa napagwa ang opisyal nga medal tally kag may yara pa sang mga hampang nga ipatigayunon subong nga aga may tyansa pa ang Negros.
Sa report ni Sison, nakuha sang Negros Occidental ang championship sa softball kag football sa elementary kag secondary level.
Samtang, nakuha naman sang probinsya ang third place sa baseball game.
Ginalantaw man sini nga dako ang potential sang volleyball team nga magdaog sa championship game sini subong nga aga.
