Nagapabilin nga maayo ang partisipasyon sang delegasyon sang Negros Occidental sa nagadayon nga Western Visayas Regional Athletic Association (WVRAA) meet 2023 nga ginapatigayon sa probinsya sang Aklan.
As of 5:00PM kahapon sang hapon, nagapangaduha ang Negros Occidental sa medal tally sa elementary nga ginalakipan sang 11 ka gold medals, 15 ka silver medals kag apat ka bronze medals; kag nagapangaduha man sa secondary level nga may 13 ka gold medals, 10 ka silver medals kag 13 ka bronze medals.
Sa interview sang Bombo Radyo Bacolod kay Romeo Sison, Division Sports Officer sang DepEd Division-Negros Occidental paagi kay WVRAA Bombo Correspondent Antonio Oquindo, ginpahayag sini nga madamo na sang medal nga nakuha ang Negros Occidental santo sa partial and official medal tally sang elementary kag secondary category bangud ang official nga resulta ang magikan sa committee sang WVRAA nga nagaevaluate sang official results sang hinampang.
Suno kay Sison, santo sa report sang mga coaches sa ground, madamo na sang gold nga nakuha ang probinsya kun sa diin pila diri ang swimming kag arnis.
Suno kay Sison, halos nagdalaog ang mga players sang Negros Occidental sa ball games.
Nagdalaog man ang mga players sang probinsya sa rocket games kaangay sang badminton kag table tennis.
Ginpahayag man sini nga maayo ang mga kondisyon sang mga athletes sang Negros Occidental.
Nakakuha man sang apat ka gold sa chess ang Negros Occidental kun sa diin ginakabig nga denominated sang Negros Occidental ang mga hampang sa WVRAA.
Samtang sa aero gymnastics naman, tatlo ka gold medal man ang nakuha sang probinsya.
Sa athletics naman ginapanan-aw ni Sison nga medyo mahina ang mga atleta bangud wala maayo nakapractice ang mga ini bangud bag-o lang narehabilitate ang Panaad Park and Stadium.
Ginalantaw man nga madamo sang madala nga mga atleta sang probinsya nga magahampang sa Palarong Pambansa bangud sa nagliligad makita man nga halos 50 porsyento sang delegado sang Western Visayas sa Palarong Pambansa ang nagikan sa Negros Occidental.
Natalana nga magatakop ang WVRAA sa Domingo, Abril 30.
Sa report naman ni WVRAA Bombo Correspondent Antonio Oquindo, nangin maayo nga signos ang mga medalya nga nakuha sang Negros Occidental.
Suno kay Oquindo, nagdugang nga medalya sa Negros Occidental amo ang long jump secondary girls, nakakuha sang silver samtang nakuha sang Iloilo ang gold medal; sa Basketball Elementary nagdaog ang Negros Occidental batok sa Aklan sa score nga 124-48; amo man sa secondary boys nga ginrepresent sang Santa Ana de Victorias nga nakakuha sang score sang 98-78 batok sa Aklan, sa Archery sa 30 meters 1 gold kag 1 bronze ang nakuha sang Negros Occidental, sa 50 meters Archery 1 gold ang Negros Occidental; kag sa swimming elementary males, tatlo ka gold.
Samtang sa Basketball 3 on 3 ang Negros Occidental ang nakakuha sang Silver medal.
