Ginatos naman ka buhi nga baboy ang ginpadala sang Negros Occidental sa probinsya sang Batangas kahapon via BREDCO Port.
Sa interview sang Bombo Radyo Bacolod kay Provincial Veterinarian Dr. Renante Decena, isa ka barge ang may average nga 600 heads ang naglayag kahapon padulong sa Batangas.
Ang kabug-usan nga napadala sang probinsya sa Luzon nga live hogs ang nagdangat sa 6,343 sa bulan sang Mayo.
Ginpahayag man sini nga 100 heads kada semana ang nagabiya sa Hinobaan nga shipment sang baboy para sa Cebu, kag ang iban ang ginapadala man sa Manila via land trip ukon RoRo bangud indi man makaagi sa Oriental Mindoro.
Ginpahayag man sang pinuno sang PVO nga ang presyo sang pagpamakal sang baboy sa Cebu ang yara sa P155 kada kilo sang live weight samtang ang sa Bulacan ang nagadalagan sa P235 kada kilo, kag ang mataas nga presyo ang yara sa Laguna nga nagadangat sa P245 per kilogram sang live weight.
Samtang, ang average naman nga presyo sang live weight sa probinsiya sang Negros Occidental ang yara lang sa P140 kada kilo gikan sa syudad sang Kabankalan kag Sagay kasubong man sa banwa sang Hinoba-an kag Moises Padilla, samtang ang nagikan sa banwa sang Calatrava ang yara sa P116.
Ginpahayag man sini nga P170 kada kilo sang live weight sang baboy ang ginpadala sa Luzon nagikan sa Bredco sang tinalikdan nga adlaw.
Gin-athag man sini nga ang presyo sang baboy ang nagavary kada semana.
Nagadalagan man sa P140 ang deperensya bangud sang una nagadangat ang presyo masobra sa P200 ex bredco, kag karun, ginpanaug sa P170 bangud nakaapekto man diri ang importation sang baboy.
Ang mga lugar nga nagakinahanglan sang supply sang baboy nagikan sa probinsya ang ginalakipan sang Bulacan, Pangasinan, Cavite kag Batangas.
Ginpahayag man ni Decena nga ang ginpadala sa Batangas ang nagsaka man ang presyo sa P10.00.
Ginkompirmar man sini nga nagapabilin ang presyo sang karne sang baboy sa probinsya.
Suno sa PVO head, 100 kgs live weight ang required nga ipadala nga baboy sa Luzon.
Suno kay Decena, 60 percent nagikan sa commercial piggeries kag 40 percent nagikan sa backyard piggeries ang ginapadala sa Luzon.
Ginpahayag man sini nga ang bili sang isa ka baboy ang daw kaangay sang bulawan bangud ang isa ka baboy ang nagadangat sa P20,000,000.
Ginpahayag man sini nga nakaestablisyar na sila sang contract to buy sa mga feeders.
