Nagpanguna ang Negros Occidental sa mga probinsya sa Western Visayas sa may pinakamadamo nga nabakunahan batok sa COVID-19 sa 3-Day National Vaccination drive kahapon.
Suno sa report sang Department of Health as of 9:00 pm kagab-i, nagdangat sa indi magnubo 70,663 ang nabakunahan kun sa diin 68,249 ang natublukan sang first dose; 2,396 ang second dose; kag 18 ang natublukan sang booster shot.
Sa record sang Provincial Health Office, ang Bago City ang nagpanguna sa may pinakamadamo nga nabakunahan bangud sa 6,221 nga naadminister nga first dose kag 21 ka second dose.
Nagpangaduha naman ang Cadiz City nga may naadminister nga 6,081 para sa first dose kag duha sa second dose.
Ginsundan ini sang Sagay City nga nakatublok sang 5,488 para sa first dose.
