Yara na sa kustodiya sang probinsya sang Negros Occidental ang pinakauna nga alokasyon sang 1,950 vials nga Pfizer vaccine nga nag-abot takna alas-8:00 kagab-i.
Ang isa ka vial ang nagaunod sang anum ka doses sang Pfizer vaccine gani yara ang kabug-usan sa 11,700 doses.
Ang alokasyon sang national government sa probinsya ang nagikan sa 2.2 million Pfizer vaccine nga nabatun sang Pilipinas gikan sa COVAX facility.
Ini naman ang nagakinahanglan sang ultra low cold storage nga nagadangay sa negative 80 degrees celcius.
Suno kay Dr. Zeaphard Gerhart Caelian, Provincial Incident Management Team (PIMT) commander, sila ang nagsugat sa mga bakuna gikan sa airport nga nabutang sa duha ka boxes.
Ang kada box ang nagaunod sang 925 vials kun sa diin ang isa ang gindala sa ultra low cold room sang Teresita Jalandoni Provincial Hospital sa Silay City samtang ang isa ka box ang yara sa ultra low cold storage sang Provincial Engineering Office.
Paathag ni Caelian nga ang ginahatagan lang sang alokasyon sang Pfizer Vaccine amo ang mga local government unit (LGU) nga may ikasarang sa pagstore sini.
Nahibaluan nga mas manubo ang temperature requirement sang Pfizer vaccine kun ipaanggid sa iban nga mga COVID-19 vaccines.
Suno kay Caelian, nangin masako ang mga ini kahapon bangod kaagahon pa ang mga ini nagpangbyahe sang mga COVID-19 vaccines sang probinsya padulong sa nagkalainlain nga banwa kag syudad kag ginsundan pa sang delivery sang Pfizer Vaccine pagkagab-i.
Suno kay Caelian, wala paman sini mahibaluan kun san-o ang masunod nga alokasyon apang ginalauman na sini nga sa Hunyo kag Hulyo madamo sang nanarisari nga brand sang COVID-19 vaccines ang magaabot sa Pilipinas.
Dugang pa sang PIMT Head nga nagakabalaka na si Negros Occidental Governor Eugenio Jose “Bong” Lacson sa mga nagakalamatay bangod sa COVID-19.
Gani panugyan sini nga magpabakuna, bangod ini ang nakita sini nga yabi agud malikawan ang severe cases enkaso nga malatnan sang virus.
