600 doses sang Astrazeneca vaccines nga ginbakal sang probinsya kag 10,000 doses sang Sinovac vaccines nga gindonar ang nag-abot sa Negros Occidental kahapon.
Sa interview sang Bombo Radyo kay Negros Occidental Provincial Administrator Atty. Rayfrando Diaz, nagalaom ini nga madayon sa masunod nga semana ang ginapaabot nga doses sang Astrazeneca vaccines nga ginprocure sang probinsya agud maroll-out na ini sa A4 category ukon mga economic frontliners.
Suno sa iya, luyag man sini nga mangin madasig ang pagbakuna sa tanan apang limitado lang ang available nga vaccines.
Ginpakigbahin man sini nga 70% lang ang utilization rate sang Moderna vaccine bangud ini ang exclusive sa mga senior citizens ukon A3 kag madutay lang sa mga ini ang nagapalapit agud magpabakuna bangud luyag nila ang single dose Johnson and Johnson.
Sa karun suno kay Diaz, priority gid nila ang mga senior citizens bangud kun indi malab-ot ang target diri, indi man makaproceed sa pagbakuna sa mga A4 categories gamit ang donated vaccines.
Suno diri, plano nila nga magbalay-balay nalang sa mga senior citizens agud mapadasig ang rollout.
Nagpanugyan man ini nga wala sang prebiliheyo nga magpili sang bakuna bangud kadamo ang wala nagpavaccine kag naghinulsol matapos natapikan sang virus.
Suno diri, yara na sa 10% sa target nga populasyon sang probinsya ang fully vaccinated.
