60 ang panibag-o nga nagdugang sa kaso sang COVID-19 sa probinsya sang Negros Occidental kahapon samtang 31 naman ang nagdugang nga kaso sa syudad sang Bacolod.
Sa COVID-19 Regional Case Bulletin No. 519 nga ginpagwa sang Department of Health Center for Health Development-Western Visayas, nadugangan sang 762 ang kaso sa Region 6.
Sa nasambit nga numero 54 diri ang nagikan sa Aklan; 34 sa Antique; 66 sa Capiz; 31 sa Guimaras; 383 sa Iloilo; 60 sa Negros Occidental; 31 sa Bacolod City kag 103 ang nadugang sa Iloilo City.
Bangud diri, nagdangat na sa 102,521 ang kabug-usan nga kaso sang COVID-19 sa Western Visayas kun sa diin nadugangan sang 621 ang mga nag-alayo sa balatian gani yara na ang kabug-usan nga recoveries sa 88,372 samtang nagdangat naman sa 2,437 ang death toll matapos madugangan sang siyam ang mga nagtaliwan bangod sa virus.
59 sa mga nadugang sa kaso sang COVID-19 sa probinsya sang Negros Occidental ang local cases kag isa ang locally stranded individual (LSI).
Samtang lunsay local cases naman ang 31 nga nadugang sa kaso sang Bacolod City.
Nagdangat na sa 16,566 ang kabug-usan nga kaso sang COVID-19 sa Bacolod kun sa diin 861 ang aktibo; 15,310 ang nag-alayo kag nagdangat na sa 392 ang nagtaliwan.
Samtang yara naman sa 22,319 ang kabug-usan nga kaso sang COVID-19 sa Negros Occidental kun sa diin 1,404 ang aktibo; 20,441 ang nag-alayo kag nagdangat na sa 465 ang death toll.
